♡♡
بداية النهايه ~
واقتربنا للنهايه بمشاعر متناقضه
بين سعادتنا بان التعب اللي تعبناه طول ال 12 سنه بينتهي قريب
وخوفنا من انها تكون اخر سنه تجمعنا
في هاذي السنه تعبنا مع بعض وفرحنا مع بعض وتشاركنا احزاننا قبل افراحنا بعد مع بعض صرنا متشابهين في اشياء كثيره
نعرف وش في نفوسنا بس من نظرات
كل وحده مننا إذا كانت لوحدها مهمومه تتضايق ومعد تبي تشوف احد وبمجرد م نتقابل تتلاشى همومنا وكأنها م كانت
عشنا ايام حزينه وكئيبه بمعنى الكلمه -الله لا يسقيها -وعكسها تماما عشناه ف الايام الباقيه سوينا اشياء جنونيه واحيانا مقالب جامده طقطقنا على بعض ولعبنا مع بعض شلنا حدودنا بين بعض بس حدودنا نتمسك فيها إذا كنا مع ناس رسميين معاهم
احس بالاحراج والندم إذا بكيت وشفتهم جنبي
لاني احس ان وجودهم لوحده كافي باني م انزل دمعه ولا افكر اني احزن
حنونات وبحياتي كلها م شفت مثل حنيتهم
هاذي السنه بشكل عام مرت علينا قاسيه شوي ومتعبه ولكن وجودنا مع بعض هونها علينا
للحين ماني مستوعبه كيف دارت الايام بسرعه وصرنا باخر سنه ثانوي
كل م افكر في ذا الشي يجي في بالي
انها اخر سنه بالبس المريول واخر سنه بنجلس على طاولات وكراسي انحفرت ذكرياتنا عليها واخر مره نحضر طابور صباحي ونتهزأ فيه على المخالفات واخر مره نتجمع فيها جمعات خبال وفجأه تقلب كلها مويه واخر مره نتعاون فيها على وحده نايمهه ونزعجها وكثيرر اشياء
بنفقد اشياء كثير طاولاتنا اللي كتبنا عليها ذكريات واسامي واماكننا اللي كان لنا فيها ذكريات حلوه الاوراق اللي كنا نلعب فيها ونكتب بافقد ضحكنا اللي يصير فجأه وتحريجنا على بعض ومزحنا الثقيل
وقمطاتنا وقت التفتيش وقفطات الهروب ولعبنا تحت المطر وامانينا اللي كتبناها على بالون وطيرناها ولا ندري وين وصلت
بنفقد بعض اكثر من اي شي واهتمامنا في بعض ..
والدفتر اللي بيننا والاشياء الغريبه اللي محتفظين فيها
اخواتي \"عدوات الجمال \"
عمري م راح انساكم ولا انسى ايامي معاكم ولا اي لحظه حلوه او شينه عشتها معاكم ابي تعرفون بس اني احبكم ورح اضل لاخر يوم بعمري افكر فيكم ومحفظه بكم ف قلبي
اتمنى من ربي انها م تكون اخر سنه تجمعني فيكم ولا يكون اخر عهد لنا مع بعض ويوفقكم ان شاء الله ويحقق امانيكم واشوفكم في مناصب قويه ويجمعني فيكم ف الجنان ولا يجعلني اذوق حزنكم ولا يفجعني فيكم ويخليكم لي ولا يحرمني منكم ..
اخبل فيكم ي دغباوات ~
2014  1453